ភ្នំពេញ ៖ ឆ្លើយតបនឹងសំណូមពររបស់ប្រជាពលរដ្ឋស្នើសុំចាក់វ៉ាក់សាំងការពារកូវីដ-១៩ តាមរយៈ comment ក្នុងហ្វេកបុកផ្លូវការរបស់សម្តេចតេជោនាយករដ្ឋមន្ត្រីនៅថ្ងៃទី០២ ខែឧសភា ឆ្នាំ២០២១នេះ សម្តេចតេជោបានប្រកាសថា "នឹងចាក់ជូនគ្រប់ៗ គ្នាគ្រាន់តែមានមុនមានក្រោយ ព្រោះពេទ្យយើងមិនអាចធ្វើមួយថ្ងៃឬមួយសប្តាហ៍អស់ទេ។ 

នាយករដ្ឋមន្ត្រីនៃកម្ពុជាសម្តេចតេជោ ហ៊ុន សែន បានបន្តឆ្លើតតបទៀតថា យើងនឹងចាក់ជូនបងប្អូននៅភ្នំពេញនិងខេត្តកណ្តាលឱយរួចរាល់ក្នុងខែឧសភានិងមិថុនា២០២១នេះ។ ពេលនេះកំពុងប្រម៉ូលផ្តុំការខិតខំចាក់នៅតំបន់ក្រហមឱយបានមុន។ សូមបងប្អូនអត់ធ្មត់រង់ចាំ បន្តិចវ៉ាក់សាំងនឹងយកទៅចាក់ជូនបងប្អូនឱយបានគ្រប់ៗគ្នា។

ក្នុងសារឆ្លើយតបហ្វេសបុក សម្តេចតេជោ ហ៊ុន សែន បានសង្កត់ន័យថា ខ្ញុំប្រើពាក្យថាស្រោចវ៉ាក់សាំងជូនប្រជាជននៅភ្នំពេញឱយមានភាពសាំមិនឱយមានឆ្លងកូវីដ១៩តទៅទៀត។

ការឆ្លើយតបរបស់សម្តេចតេជោនាយករដ្ឋមន្ត្រីតាមហ្វេកបុកផ្លូវការពេលនេះត្រូវបានធ្វើឡើងបន្ទាប់ពីអ្នកលេងហ្វេសបុក គណនីឈ្មោះ «Ben KH» បាន Comment នៅលើទំព័រហ្វេសបុករបស់សម្តេចតេជោ ចំពោះអត្ថបទដែលសរសេរថា «តើកំពូលកីឡាករបាល់ទាត់ Messi និង Neymar អាចស្លាប់ទេ ក្រោយចាក់វ៉ាក់សាំងចិន?  ដោយម្ចាស់គណនីហ្វេសបុកខាងលើបានសរសេរថា «ខ្ញុំបាទសូមគោរព សម្តេចពុក។ ខ្ញុំបាទស្នាក់នៅភូមិ ៨ ក្រុមទី ៣០ សង្កាត់បឹងកក់១ ផ្លូវ៥១៦ ខណ្ឌទួលគោក ខ្ញុំបាទនិងភូមិអាយុក្រោម៦០ឆ្នាំ ប្រហែល ៩៨% មកដល់ពេលនេះមិនទាន់បានទទួលការចាក់ វ៉ាក់សាំង លើកទី១ នៅឡើយទេ។ សូមសម្តេចពុក ជួយកូនចៅអោយបានចាក់នឹងគេផង។ សូមអរគុណ»។

គួរបញ្ជាក់ផងដែរ សម្តេចតេជោនាយករដ្ឋមន្ត្រីនៃកម្ពុជាបានដាក់ចេញនូវទិសដៅផ្តល់ការចាក់វ៉ាក់សាំងការពារមេរោគកូវីដ-១៩ដោយឥតគិតថ្លៃជូនប្រជាពលរដ្ឋនិងបរទេសដែលរស់នៅក្នុងព្រះរាជាណាចក្រកម្ពុជាឱ្យបានយ៉ាងហោចណាស់ ១០លាននាក់ទៅ១៣លាននាក់។